ట్యాంక్ ఫుల్ చేస్తే 1400 కి.మీ. ప్రయాణం.. వచ్చేసింది రెనో 'డస్టర్' హైబ్రిడ్

భారత ఆటోమొబైల్ మార్కెట్లో ఎంతో ఆసక్తిగా ఎదురుచూస్తున్న రెనో డస్టర్ స్ట్రాంగ్ హైబ్రిడ్ ఎట్టకేలకు విడుదలైంది. 2026 డస్టర్ లైనప్‌లో భాగంగా ‘డస్టర్ స్ట్రాంగ్ హైబ్రిడ్ E-టెక్ 160’ పేరుతో ఈ కొత్త మోడల్‌ను రెనో ఇండియా లాంచ్ చేసింది. దీని ప్రారంభ ఎక్స్-షోరూం ధరను రూ.16.99 లక్షలుగా నిర్ణయించారు. అత్యుత్తమ మైలేజ్, శక్తివంతమైన ఇంజిన్‌తో ఈ కారు మిడ్-సైజ్ SUV సెగ్మెంట్‌లో టొయోటా అర్బన్ క్రూయిజర్ హైరైడర్, మారుతి సుజుకి గ్రాండ్ విటారా/విక్టోరిస్ వంటి మోడళ్లకు గట్టిపోటీ ఇవ్వనుంది.

ఇంజిన్, పెర్ఫార్మెన్స్ వివరాలు

ఈ కొత్త డస్టర్ హైబ్రిడ్‌లో 1.8 లీటర్ల నాచురల్లీ ఆస్పిరేటెడ్ పెట్రోల్ ఇంజిన్‌తో పాటు రెండు ఎలక్ట్రిక్ మోటార్లు (జనరేటర్, ట్రాక్షన్ మోటార్) అమర్చారు. ఈ పెట్రోల్ ఇంజిన్ 108 bhp పవర్, 172 Nm టార్క్‌ను ఉత్పత్తి చేస్తుంది. ఎలక్ట్రిక్ మోటార్లతో కలిపి ఈ సిస్టమ్ మొత్తం 158 bhp పవర్, 208 Nm టార్క్‌ను అందిస్తుంది. ఇందులో 1.4 kWh సామర్థ్యం గల బ్యాటరీ ప్యాక్‌ను ఉపయోగించారు. ఈ కారు కేవలం 9.61 సెకన్లలో 0 నుంచి 100 కిలోమీటర్ల వేగాన్ని అందుకుంటుంది.

మైలేజ్, రేంజ్ ముఖ్యాంశాలు

స్ట్రాంగ్ హైబ్రిడ్ టెక్నాలజీ కారణంగా ఈ కారు మైలేజ్ విషయంలో సంచలనం సృష్టిస్తోంది. ARAI సర్టిఫికేషన్ ప్రకారం, ఇది లీటర్‌కు 29 కిలోమీటర్ల మైలేజీని అందిస్తుందని కంపెనీ ప్రకటించింది. ఒక్కసారి ట్యాంక్ ఫుల్ చేస్తే సుమారు 1,400 కిలోమీటర్ల వరకు ప్రయాణించవచ్చని రెనో తెలిపింది. నగరాల్లోని ట్రాఫిక్‌లో దాదాపు 80% ప్రయాణాన్ని పూర్తిగా ఎలక్ట్రిక్ (EV) మోడ్‌లోనే పూర్తి చేయగలదని పేర్కొంది. ఇది వినియోగదారులకు ఇంధన ఖర్చును గణనీయంగా తగ్గిస్తుంది.

వేరియంట్లు, ధరల వివరాలు

రెనో డస్టర్ స్ట్రాంగ్ హైబ్రిడ్ మూడు వేరియంట్లలో అందుబాటులో ఉంది. వాటి ఎక్స్-షోరూం ధరలు ఈ విధంగా ఉన్నాయి:

ఎవల్యూషన్: రూ. 16.99 లక్షలు
టెక్నో: రూ. 18.99 లక్షలు
ఎమోషన్: రూ. 19.49 లక్షలు

భారత మార్కెట్లో తమ స్థానాన్ని మరింత పటిష్ఠం చేసుకునేందుకు రెనో చేపట్టిన 'ఫ్యూచర్‌ రెడీ' ప్రణాళికలో భాగంగా ఈ కొత్త మోడల్‌ను తీసుకొచ్చింది. ఈ కారు రాకతో దేశంలో స్ట్రాంగ్-హైబ్రిడ్ SUV సెగ్మెంట్‌లో పోటీ మరింత రసవత్తరంగా మారింది.